Pajūrio naujienos
Help
2024 Kovas
Pi 4111825
An 5121926
Tr 6132027
Ke 7142128
Pe18152229
Še29162330
Se310172431
Komentarų topas

Mintis sogolė i ontra puoezėjės kninga

  • Audronė GRIEŽIENĖ
  • Būkem žemaitē
  • 2023-03-21

„Ta kningelė mon pate yr be gala graži ė jauki“, – džiaugies Daiva Stonkuvienė.

Pavasariou atejus, pasauli išvyda ontruoji žvainėškės (Kretinguos r.) Daivas Stonkuvienės puoezėjės kninga, katrou somaketava ė 100 egzempliuoriu tiražo ėšleda Kaunė esonti kūrybėnė spaustovė „Ridsales“.

Eilierašte ožgimst kone kuožna dėina

Pėrmoujė kninga „Mintys tartum paukščiai“ so 170 eilieraštiu 2021 metas Daiva ėšleda tėn pat. Šiuon syki leidykla pakvėitė dalyvautė pruojektė, katruo tėkslus puoezėjės skaitytuojus sopažindintė so skėrtingas autuores ėš vėsuos Lietovuos. Vėinintelė salyga – tegaliejė pateiktė ne daugiau, kap po 50 eilieraštiu.

Daiva joukas – anū torinti prirašiusi tėik, ka dar ė treti kninga ėšetom šėndėin pat, nes bėnt pu vėina sokor kuožna dėina. Kas anou ikvep rašytė? Saka: „Parskaitau kuokė patinkontė frazė, ėšgėrsto iduomė minti, važioudama i darba Muosiedi gimnazėjuo pamatau graži vaizda... Ė prilimp, ė parsekiuo vėsa dėina – torio igyvendintė, ėšrotolioutė anū ligi gala.“

Api kū ana raša? Api vėskū, tik ožsakuomūju prisilestė nanuor, neišen. Nuors vėina syki, kumet Muosiedi gimnazėjės muokytuojė paprašė, pavyka. „Muokytuojė mon sakė, ka vaka nuor paišytė pagal eilierašti, katram būtom daug vaizdū, vo tėi, kor yr bėbliuotekas kningelies, jau skaityti parskaityti – neiduome. Pabondiau – prikūriau ė api grybus, ė api stėrniokos, ė api dar daug kū“, – šypsuojuos Daiva.

Anuos eilierašte daugiause api jausmos, emuocėjės, kartas – ne būtėna sava. „Vėina syki parašiau api meilė... vaje, ka pradiejė imbarėške klausėnietė, a jau aš meiloži kuoki betorinti?“, – joukies so vyru Antano tvėrta šeima sene sokūrusi, sūnu ė dokra i gyvenėma ėšledosi, daba anūka Puovėla pasiekėmas mozėkuo besėdžiaugonti Daiva.

Puoetė savės nelaika

Nelaikytė ožgniaužos savy, ont balta lapa ėšsėlėitė puosmas anou ikvep ė asmenėne ėšgyvenėma – sokrietosi dar jaunuos sesers mėrtis nu onkuoluogėnės liguos, nomū rūpeste, boitis, vakų gyvenėma.

Bet pėrmūsius do eilieraštius Daiva sokūrė dar besimuokydama dvylėktuo klasie, kumet par lietoviu kalbuos pamuoka reikiejė rašytė rašini pagal Simuonaitytės ruomana „Vilius Karalius“. Nebova parskaitiosi tuos kningas, o priš muokytuojė jog riekiejė vaidintė, ka kažkū raša. Nesvarbu, ka ož rašini tumet gava do dvejetos, by tik tėi eilierašte ėšejė.

„Moni yr kvėitė dalyvautė ta vėinamė, ta kėtamė kūrieju klubė, bet aš lig šiuol nedrestu“, – sakė Daiva. Ana savės puoetė nelaikonti, vo vėskū, kū paraša, vadėn „svaigoliokas“.

Naujė ažūrėnes mielinas vėršeles, kėtuo posie pagražintas auksa spalvuos ornamentas, kningelė, katrou leidykla atsiuntė par patė Kuova 8, Daiva glaudė pri šėrdėis ė sakė, ka jausmus yr nepakartuojams, nesėtėkiejosi, ka somaketous tep graže. „Pagal dydi ė forma ta kningelė mon primen laba jaukė ožrašėnė“, – apėbūdėna ana.

Tik kažėn, diel kuo kningelie nier ni vėinuos iliustracėjės, jog pati Daiva muok paišytė, laisvalaikio tapa paveikslos. Pasėruoda, kninga so iliustracėjuom ėšsėlestė būtu bovė beveik dvėgoba brongiau...

,b>Yr bibliuotekininkė ir tou patenkinta

Gegožės mienesie leidykla „Ridsales“ Kaunė žad organizoutė autuoriu ėš vėsuos Lietovuos, katrū kningelės ėšleda, sosėtėkėma. Bet dar onkstiau, kuova 21-oujė, kumet būs mėnėma Pasaulėnė puoezėjės dėina, D. Stonkuvienė sava kūryba pristatys Muosiedi gėmnazėjės bėbliuotekuo, kor dėrb vėinioulėktos metos.

Eilieraštius kuronti, tapytuojė-miegiejė, jaunystie truoškosi studijoutė režisūra, svajuojosi vaidintė scenuo... Diel kuo gyvenėmė nepasirinka menėnės kryptėis? I tou klausėma Daiva atsakė tep pat klausėmu: „Vo a bibliuotekininkystė – ne mena kryptis?“

Šes laikas nesou tep, ka bibliuotekininka pareiga yr kninga ėšdoutė, kninga priimtė. Veikluos, ė iduomiuos, – oho kėik! Rėnginius organizoutė, edukacėjės vestė, so informacėniem technuoluogėjuom dėrbontiems vakams pamačytė... „Jog ne ba rekala sakuoma: klausk bėbliuotekininka, ė ons tau padies“, – šmaikštava D. Stonkuvienė.


Visos teisės saugomos. © 2006-2017 UAB 'Pajūrio naujienos'. Atsakomybės apribojimas. pingvinas