Pajūrio naujienos
Help
2021 Birželis
Pi 7142128
An18152229
Tr29162330
Ke3101724
Pe4111825
Še5121926
Se6132027
Orų prognozė
Dieną30°C debesuotumas 1 %
Naktį19°C debesuotumas 1 %
Apklausa

Ar jus bedomina viešos rajono valdžios rietenos?

Taip
Ne
Neturiu nuomonės
Komentarų topas

Velniū priiedusi buoba

  • Būkem žemaitē
  • 2019-07-30

Kaime gyvena tuokė puskloikė p pana Kuotrė. Ne tep jau gatava dorna, bet be vėina šriūba. Gražoma bova graži, bet vės tėik vyra būtom negavusi. O ka gava dėdėli skarba ėš Amerikas, ėš gėmėniū, ė dar daug auksėniu piningū, toukart išdyga ė kavalierios. Tas Kuotrė ė pagrobė ož torta. Vakū prėdėrba cielus devynis.

Ka gyvenuom pri rusa, žmuonės Ožgavieniu nikumet neužmėrša. Sosėrenk, būdava, vyru būrys, apsimausta lėčynuom ė duj po vėsus kėimus. Tep jau nutėka, ka vėsos polks žydeliu subrazdiejė i Kuotrės kėima. O Kuotrė bova ožaugėnosi poikė dokteri Magdūsė. Ėr vėinam, ė kėtam, ė partėnė šuoferiou dėdėle tėka ta Magdūsė. Ėr vėsė žyda noriejė suvėrstė i truoba. O doris bova senas, vėsas sutrešosės, lyg ėr apipovosės. Vėins žydelis norėjė doris atidarytė, pastūmė, ėr anuos išvėrta. Kažkatras netyčiuom dar ėr longa stėkla ėškūlė.

Kuotrė pradiejė šaukti gvaltas. Žyda ėšsėgonda ėr išskyda kuožns sau. O Kuotrė aiške pažėna tou Magdūsės nuoriejusi šuofereli. Sogniaužė kūmsti. „No, palauk!“, – pagrūmuojė.

Kuotrė onkstėi atsėboda. Pasiėmė ėlga žiuogri ėr nurėtėna tėise pri šuoferi, katruo pati bova vyr. buhalterė.

Bar bar bar su žiuogrio i longa. Atsilėipė žmuona. „A tas tava k... parejė nomėi?“ „Ku nuori? Kou padarė?“ „Dar klausi? Doris solaužė čysta“. „Mauk nomėi“. „Ne, ne nomėi. O ryta meta tėise – i rajuona“. Ėšsėgonda buhalterė. Gėrtė bova, rasi ku ėr padarė? „Vo kėik nuori ož tou ėškada?“ „Atriežk palti lašiniū. Stuorū. Ėr nemaža gabala. O je ne, teismou neužteks ėr vėsa bekuona“.

Buhalterė pamatė, ka so tou kloika joukū nebūs. Atriežė tū lašiniū, magaryčiuoms pridėjė da ėr sūri.

Ėr ta puskloikė Kuotrė tep jau bova ipratusi – ož menkas padarytas baikas žmuonis nukėntiedava skaude. O ta Kuotrės doktie tėkra bova graži. Patėka ėr kolchuoza pėrmininkou Beniou. So Benio Kuotrė leda Magdūse draugautė. Žadiejė Magdutė irėdyte i raštėnė skaičioutė darbadėiniu.

Tep plepont žmuonims, nugėrda pėrmininka žmuona. Ėr pradiejė tuos vyra panuos ėiškuotė. Nomūs nerada. Kėtė pasakė, ka raun lėnus. Ėr tep Benienė atsidūrė linū laukė. Benienė nuliekė pri Magdūsės. Vėsė kėtė sustuojė žiūr, kas čia būs? Pliaukšt pliaukšt skielė per ausis. Žmuonis teiraujas kėts kėta: „Kas čia notėka?“. Vėins špuosininks atsakė, ka Magdūsė „ded“ i raštėnė, ėr pats nusijoukė. Tou pamačiosi Kuotrė nuleda galva – nebova kū beiskūstė.

Kuotrė varga su vyru vėsa omželi. Vaka išskyda i šalis. Kuotrė čiūžiniejė po nomus. Vyrs dėrba krepšios, grėblios, dalgkuočios. Nu Kuotre piningus turiejė kavuotė. Je jau ana rada, – piningū nier. Pėrka maruoza, šokolada. Vyrs stėpre sosėrga. Lėga nepagyduoma. Piningus nunešė pas kaimyna Vyti ėr pasakė: „Ka jau numėrsiu, piningū nunešk i bažnyčė ėr užpėrk skaitytėnės Mėšės ož mona dūšė“.

Kuotrė dūsava, kad vyrs sunke serg, gal ėr numėrtė. „Tievali, sakyk, kor pininga?“ Tas – nieka. Tou dėina bova atvažiavęs pirmagėmis sūnus Kazė. „Ek to, gal pasakys“, – Kuotrė pro doris ėšstūmė.

„Tieva, sakyk, kor pakavoje piningus?“ Tas tik soinkštė, nosėsoka i sėina ėr numėrė.

O tada nomūs – kars. .. Vyra luova išvėlka laukon, čiūžėni, patalus. Puoduškas supjaustė i mažos šmuotelios. Plunksnuoms aptema ėr dongos. O piningū nerada juokiū.

Tik Kuotrė nubraukė nu akiū prikėbusės plunksnas. Mata, aten kaimyns: „Atnešiau piningus. Tava vyrs pas moni bova pasėdiejės. Matau, ka esat biedni. Tik užpėrkėt Mėšės.“

Kuotrė nuleda galva ėr nieka nebesakė. Palaiduojė vyra, kap ėr vėsi. Pri doube sokalbiejė omžėna atėlsi ėr ėlga galvuojė. „Vės tėik ons bova mona vyrs. O kėts būtu monės ėr neiemės. Skysta bovau“, – prisėpažėna Kuotrė pati sau.

Baužys Jozė iš Kumpėku suodas


Visos teisės saugomos. © 2006-2017 UAB 'Pajūrio naujienos'. Atsakomybės apribojimas. pingvinas