Pajūrio naujienos
Help
2021 Gruodis
Pi 6132027
An 7142128
Tr18152229
Ke29162330
Pe310172431
Še4111825
Se5121926
Orų prognozė
Dieną1°C debesuotumas 72 %
Naktį-2°C debesuotumas 10 %
Apklausa

Ar šventinės gerumo, labdaros akcijos sprendžia skurdo problemas?

Taip
Ne
Neturiu nuomonės
Komentarų topas

Jau aštontus metos Lėtuanīstikas cėntros ėr Jorgė Pabriežas oniversitetinės gėmnazijas lietoviu kalbuos muokituojės, šiū eilučiu autuorės, Jadvīga Mėižetienė so Milda Šokienė vīkda pruojekta „Žemaitiu pastuogie – gīva tautuos dvasė“, katruo pagrėndėnis tėkslos – skatīntė jaunuolios mīlietė ėr puoselietė žemaitiu tradicijas ir papruotios, gėmtoujė tarmė, ogdītė kūrėbėškōma. Vėins ėš pruojekta rėngėniū īra menėnė skaitīma konkūrsos „Žemaitiu žemie – žemaitiu kalba“, katras tapės jau tradicėnio.

Vėsė menėnė skaitīma konkūrsa dalīvē sostuojė bėndram ėsėomžėnėmou.

Anuo meto īra kvėitamė dalīvautė Kretinguos rajuona ėr miesta ogdīma īstaigu muokinē. Ėr šēs metās i konkūrsa atvīka muokinē ėš Marėjuona Daujuota ėr Kūlopienu Muotiejaus Valončiaus pagrėndėniu muokīklu, Baubliū muokīklas-daugiafūnkcėnė cėntra, Kurmaičiu pradėnės, Kartenas vėdorėnės muokīklu, Darbienu ėr Jorgė Pabriežas gėmnaziju bei Kretinguos muokīklas-darželė „Žėbutė“. Ėš vėsa mokituojē parėngė trisdešimt do skaituovos.

Vertėnėma komisija po ėlga mėslėjėma nosprėndė ėr nogalietojēs paskelbė menėnė skaitīma lauretos: pėrmū-ketvėrtū klasiu grūpiu kateguorėjuo ītaigiausē ruoda vēdė Mats Raškausks ėš Kūlopienu Muotiejaus Valončiaus pagrėndėnės muokīklas (muokituojė Audruonė Borkauskienė), Gerda Jedenkutė ėr Greta Kontrėmaitė ėš Darbienu gėmnazėjas (muokit. Zinaida Daukontienė), Samanta Žebrauskītė tēp pat ėš Darbienu gėmnazėjės (muokit. Jostina Vaičikauskienė) bei ėš darželė-mokīklas „Žėbūtė“ atkeliavės Edvins Zūbė (muokit. Janina Šėpavėčienė), o Rasa Žotautaitė ėš Marėjuona Daujuota pagrėndėnės muokīklas (muokit. Nėjuolė Meškauskienė) apdovanuota specialio prizo ož sava kurības skaitīta pasaka „Pasiklidė samaninus“.

Pėnktū-aštontū klasiu grupie geriausēs skaituovās prėpažintė Emilis Radvilavičios ėš Kartenuos vėdorėnės muokīklas (muokit. Danutė Dunauskaitė) ėr Milda Lukauskaitė ėš Marėjuona Daujuota pagrėndėnės muokīklas (muokit. Alduona Ketlerienė). Komisija pasėdžiaugė, kad ėr vėresniu klasiu muoksleivē puoselie sava gėmtoujė tarmė. Lauretė jau kelintos metos ėš eilies tapa Bėrutė Šėdlauskaitė ėš Jorgė Pabriežas oniversitetėnės gėmnazėjas (muokit. Vida Trakienė ėr Janina Šėdlauskienė). Abiturientē šēs metās atėteka ėr žiūruovu sėmpatėju prizos ož skaitīta Marijas Bučkienės teksta „Eso baisē nelaiminga“.

Poikē pasėruodė Audrios Imbrazos ėš tuos pačiuos gėmnazėjas (muokit. Jadvīga Miežetienė) ėr Iveta Janutītė ėš Marėjuona Daujuota pagrėndėnės muokīklas (muokit. Alduona Ketlerienė). Lėtuanistikas cėntros vėsīms menėnė skaitīma žemaitiu kalba dalīvēms iteikė padiekas, o laureatams - ė atmėnėma duovanelės.

Menėnė skaitīma konkurso „Žemaitiu žemie – žemaitiu kalba“ palīdietė 2013-ėjē metā – Tarmiū metā.

Organizatuorē pasėdžiaugė, kad gėmtoujė tarmė duomas ėr anou vartuo vės daugiau jaunū žmuoniū. Bōvosė gėmnazėjas muokėnie Klaipiedas oniversiteta literaturoluogijas magistrantė Eglė Palobinskaitė dalīvava ne tik vertėnėma komisėjuo, bet ėr skaitė Suofijas Kīmantaitės-Čiurliuonienės žemaitėška laiška. Tou īruoda ėr muokiniū dailės darbū paruoda „Žemaitėšku puosakiu kompozicijas“, eksponouta Lėtuanistikas cėntrė (paruošė dailės muokituojė Valduonėja Karaliūnienė).

Kretinguos Jorgė Pabriežas gėmnazėjas muokituojės Jadvīga Mėižetienė ėr Milda Šokienė


Visos teisės saugomos. © 2006-2017 UAB 'Pajūrio naujienos'. Atsakomybės apribojimas. pingvinas