Matematikas muokytuos netėkieta atsėskledė kap fuotuograps

Jurijus Ščerbakuovs sakė, ka menėnės portigrapėjės ons dara diel savės, o paruoda soorganizoutė anū ikalbiejė salontėške kuolegas.

Kretinguos rajuona Salontų gimnazėjės skaitykluo atėdaryta muokytuojaus Jurijaus Ščerbakuova menėnės portigrapėjės darbū paruoda.

„Ėšrėša“ kuolegas

Gimnazėjės dėrektuorė Aušra Zebitienė sakė, ka muokytuos į Salontus diestytė matematikas iš Plungės, kor gyven, atvažiou tik ontros metos.

„Pėrmasias metas so naujuoko mes tik pažindėnuomies, vo šimeta, kumet vėsi draugėška isišnekiejuom, kuokios puomiegios katras torem, Jurijus prasėtarė, ka dara portigrapėjės.

„No va, toukart aš lepteliejau, ė kuolegas moni „ėšrėša“, pradiejė prašytė, ka tus darbus paruodyčiau muokykluo vėsėms“, – joukies J. Ščerbakuovs.

Skaitykluo ont sėinas ėškabinta15-a iriemintu nuotrauku. Čia pavaizdoutas ė Mėrosės kuopas, ė pavasari pranašaujontis pėrms pėinės žėids, ė bėtė, ė paukštoks – no, kapt tū padareli, kol nepaskrėda, reikiejė i kadra sospietė pagautė?

Jurijus sakė fotografoudams netorėntis tėik kontrybės sielintė, tykuotė, kap ka dara Lietovuo žėnuoms gamtuos fuotuograps Marios Čepolis. Tas, kol gera kadra solauks, je rek, gal po 4 a net po 7 valondas ė krūmūs pri opės topietė, ė pėivuo golietė.

„Žėnuokėt, daba paukštoka yr ėšdrousiejė, o ėr ironga, tėksliau, makroobjektyvs arba teleobjektyvs, katrus fotograpoudams nauduoju, nuoriedams kadros pritrauktė ėš artiau arba ėš tuoliau“, – atskledė ne tik gamta, bet ė patinkontius miesta vaizdos gebontis ožfiksoutė J. Ščerbakuovs.

Paveikslou diel savės

Ka ons muokies ontruo a tretiuo klasie, pėrma fotoaparata FED-3 anam nopėrka tievs.

„Mūsa karta auga kėtuokė nego daba: nebova ni kompiuteriu, ni plonšetiu, ni mobiliūju telepuonu. Dėdžiausė pramuoga seniau būdava nu ryta lig vakara žaistė laukė. Vo je dar so savėm torieje fotoaparata, ta jautes pats svarbiausis. Nuors tas laikas fotoaparats bova prabonguos dalyks, bet mūsa kėimė daug kas iš vakū anus toriejė. Paveiksloudavuom, kū tik aplinkou matydavuom: ė kap ont leda čiuožėniejam žėima, ė sporta varžybas. Mes ėšmaniem vėsa nuotrauku daryma grondėnė: kap tomsuo i bakeli isoktė pilma, ožsėdarios vuoniuo pri rausvuos švėisuos ryškintė, ožfiksoutė, noplautė, išdžiuovintė nuotraukas. Daba tuo nebrek, daba daug kas fotograpou mobileses telepuonas“, – pasakuojė muokytuos.

Ožaugės ons ne vėina fotoaparata pakeitė, vo dabar tor posiau miegiejams, posiau pruofesiuonalams skėrta „Nicon D610“, bet jau mėslėj ė api naujesni, muodernesni.

Sava gyvenėma sosietė so paveikslavėmu Jurijus nikumet nesvajuojė, nelonkė fotobūreli, o ė daba, kumet laisvalaikio a per atuostuogas fotoaparata saka ėš ronku nepaledous, api juokės paruodas nemėslėj.

„Aš niekor nesėreklamouju, nenuorio isipareiguojėmu“, – joukies vakus matematikas muokontis, sava menėnės portėgarpėjės pats sau kompiuterie arkivoujontis ė karts nu karta i anas pasėmiegaudams pažvelgontis ėš nauji.

• Rašyti komentarą (0)